قصة وعبرة : فتاة وقعت في شباك شاب منداوي مستهتر

فتاة وقعت في شباك شاب منداوي مستهتر
وصل الى البريد الالكتروني الخاص بمواقع الصراط رسالة من فتاة من احدى القرى المجاورة لبلدتنا - اليكم نص الرسالة كما وصلت : مرحبا !! انا بنت من قريه قريبه لبلدكم كفر مندا بحب احكيلكو قصتي مع واحد من بلدكو بحكيلكو القصة عشان بلكي حدا يستفيد منها:

اتعرفت على شب من بلدكو قبل تلات سنين كنت اشوفو صدفه ما كنت اعبرو ولا اطلع عليه بس هو ضل يركض وراي وكل يوم يبعتلي مع حدا شكل خلص حطني براسو كان صحاب هو وصاحبتي كتير ضلت تزن على راسي لحد ما وقعت, احنا ناس مرباين وحتى كلمه مرحبا لشب اهلي حرموها عالبنت شوي شوي .

صرت ارخيلو الحبل شوي لحد ما صرنا حبايب يعني صرنا نحكي مع بعض عالتلفون خلصنا من المحل الي كنت اشوفو فيها وبطلت اشوفو, من بعد ما وقعت في حبه بس احكي معو من دون ما اشوفو وربي يشهد اني ولا مرة قعدت معاه او حتى سلمت علي بايدي بس يقرب ببعد, المهم بطلت اشوفو وهو كان يوعدني انو رح يجي يخطبني وانو بحبني ومن هاذ الحكي وانا صابره صبرت تلات سنين بطولهن كنت ارفض كل واحد يتقدم يخطبني عشانو كنت ارفض وما اقلو ضحيت بكتير اشياء عشانو والتعليم تركتو عشانو باخر الفترة .

انا زهقت كان حبي تحول لشفقه لالو كنت اسمع همومو وبهونها عليه وانا ماكنت احكي علي بقلبي انو بدي اياه يجي يخطبني ولا مرة ضغط علي وقلتلو تعال تخيلو بالاخر انا الي طلعت بستاهل الشفقه , حكى معي يوم الاربعا عادي ما كان في شي شكالي همومو وسكر ويوم الخميس راح خلص عروس تخيلو خطب بس شو الي عز علي اني عرفت بالصدفه انو خطب.... طيب .

شو بدكو ببنات الناس تعلقوها معكو بعدين تروحو تخطبو ما تخافو على خواتكو شو بدك فيي تلات سنين وانت رابطني بالاخر انا الي اكلت هوا... انا مو ندمانه على اشي انا بحياتي ما غلطتت او زليت وما زعلت لما سمعت هاذ الخبر.... لانو الواحد لما بدو يزعل يزعل على شي محرز.

رساله لكل الشباب وخاصه بكفر مندا بلد المافيات اتقو الله شوي ولكو انتو عم تعملو اشياء تخزي وانا شفت كتير من شبابكو برة كيفينهن شي بيخزي لما بشوفو بنت تصير ريالتكو تنزل عليهااا .

متاسفه بس هاي حقيقة اغلب شبابكو خافو على خواتكو وكنت افكر حبيبي غير هيك الي كنت اشوفهم كنت اقول اصابعي مش نفس بعض بس كنت غلطانه الاغلب نفس الشي بكرا الله ياخذ بحق الولايا منكو يا بخواتكو يا بامياتكو اتقو الله انا والله مش جايبه اشي من عندي هاي الحقيقه بلدكو خربت خربت...

بدي اقول لكل البنات تامنوش لحدا ولا وحده تامن لشب... اليوم فش امان ديرو بالكو على حالكووعلى شرفكم وسمعتكم ... صبايا احنا العيون علينا وكلو بدو يستغل لحظه ضعف عشان ينهش بلحمنا وساعتها ماحدا بقصر ... ما لازم الواحدة تبني علاقة مع شاب من ورا اهلها .... الي بدها تفوت بعلاقه من ورا اهلها تكون حذرة كتير بحكيها وتاكدو صبايا انو الشب الي بوعر بالحكي ما يكون قصدو شريف.... ومصيبتي انا انو ما كان لا يوعر ولا يخبص يعني صورلي حالو ملاك وبتصلى على اذياله واذا الشب طلب منكو انو تطلعو معو اوعكو صبايا تختلو بشب... البنت زي الزجاج اذا انخشط خشط صغير خلص اتشطب عليهاا

واتمنى لكم سنه جديده وانو كل شي يروح مع 2007 منفتح ال 2008 بصفحه جديده ونتوكل على الله وحده هادي العباد والسلام .

إلى كاتبة الرسالة :
السلام عليكم ورحمة الله وبركاته
إذا أردنا ان نحلل العلاقة مع هذا الشاب فنرى عدة أخطاء ارتكبتها وهي :
1. أنك وافقتعلى بناء علاقة معه بدون معرفة أهلك .وهذا يغضب الله
2. تقولين أنك أرخيت له الحبل , ماذا كان قصدك من ذلك ؟ وكيف ؟؟؟؟
3. تقولين انك تتصلين معه بالتليفون على مدار 3 سنوات , أين أهلك من هذا ألم يشعروا بذلك , أم أنهم راضون عن ذلك من أجل .... أن تتزوج ابنتهم ؟؟؟
4. تشهدين الله على ان علاقتك معه كانت بدون الجلوس معه او ملامسته . والله بريء من عملك هذا .

الفتيات يقمن بكل ما يستطعن لإغراء الشباب وبعد ذلك يبكين , أو يقعن في شباك هؤلاء الشباب المنحلين أخلاقياً .
أنا لا أبريء هذا الشاب مما عمله ولكن ألوم البنت لأنها لو لم تقم بالنزول تحت رغباته وإصراره وتسايره حتى أنها أحبته .... وهو لم يحبها إنما كان يتسلى ...
ولهذا قام بالتقدم لخطبة فتاة أخرى ... يمكن بنظره أن تكون اكثر محافظة على شرفها ولم تنقاد إليه وتسايره ....

فالأفضل كان عندك أن تقولي له جملة واحدة وهي التي ستبين طريق المستقبل :
إن كنت تريدني بالحلال ؟ فأبي موجود في بيتنا يمكنك التحدث معه بهذا الشأن ولا طريق إلا هذا الطريق , فأنا بنت شريفة ولا أسمح لأحد بأن يخدش كرامتي مهما كان ....
والسلام عليكم ورحمة الله وبركاته

محمد